Z世代達人

播出日期:25/5/2018

最新嘅科技資料、潮流玩意,都有《Z世代達人》麥卓華到處搜羅送到你面前!
 
亞洲萬理通公佈咗新嘅儲分同埋換機票嘅里數安排,標榜絕大部份嘅航班所得嘅里數都大幅增加最多達8成,換領部份熱門航線嘅機票所需嘅里數又減左,仲會增加可以兌換嘅機位數目,睇落好似好著數咁。不過原來係唔係真係咁So,都要睇下你平時點賺同點用D分,今日就等我同大家分析下!
 
今次最大嘅賣點,係大部份航線所賺取嘅里數都多咗。其實可能你都唔太識分之前里數係點計,咁等我再講下啦。
 
除咗FanFares 大部份時間係 O Class 係唔係都無里數之外,網上搵到嘅平飛,通常都係S、N、Q Class,以前係按實際公佈既航程嘅25%計算,以飛台北、新加坡同東京為例,舊制買Econ飛如果係呢3個Class只會分別得125、398、460 miles,如果買其他嘅Econ Class,就分別有 501、1592同1841,但按新制下,平飛嘅 S、N、Q Class台北就已經有330 miles,新加坡同東京就有 1000 miles,而貴嘅飛反而加幅就無咁多同埋再分開左兩層,M、L、V Class 台北有590、新加坡同東京就會 1800,而最貴嘅Econ Class Y、B、H、K 台北係 650 miles 同埋新加坡同埋東京就係 2000 miles。即係話,如果你喺旺季買到 M、L同V Class嘅Econ去東京,新制下係仲少左41 miles架!
 
換飛方面亦有較大嘅改變,由以往按來回或單程嘅航距去計算,改為全部以單程去計算,大部份經濟客位所需既里數都減左,去日本同新加坡現在來回由以往嘅 30000減到現在嘅 10000單程即係20000來回,而去澳洲嘅里數,亦用以往來回50000里減到現在嘅單程22000里即係44000里來回就可以了。
 
的而且確,成個計劃對大部份朋友仔來講,都係著數咗。
 
如果你好少自己真金白銀買機票,平時用信用卡嘅積分兌換大部份嘅里數去換經濟客位,咁就要恭喜你喇,因為在新計劃之下,積分無變,但好多航點都可以用較少嘅里數就換到!好似去新加坡或者日本,以前要30000來回,現在單程只需要10000里,即係20000來回,平時一年換兩套飛就直接變咗換三套啦!
 
如果你成日出trip都係真金白銀買飛,無乜用信用卡換里數,在新計劃下,就更加係大嬴家!假設你出trip嘅習慣無變,咁變相儲嘅Asia Miles就會多咗,同時因為換飛用少咗里數,一來一回,可能一年可以去多兩個短途trip架!
 
但如果你鐘意儲埋儲埋信用卡D分換里數一炮過豪張商務客位嘅飛,你嘅如意算盤就可能要打耐D先響喇。因為係信用卡嘅分數無變,但係商務客位嘅飛就貴左,好似長途去澳洲由80000來回變左45000單程即係90000來回, 如果當平均$8-$10消費先換到1里數計,你就要買多$80000-$100000野先可以補到呢個差價了!
 
所以如果你有里數在手,想換長途商務客位,就應該在6月22日新制生效前換喇。相反,如果唔急換短程既經濟客位飛,不妨等到6月22日以後先再換啦!
 
《Z世代達人》
麥卓華

追蹤我們
公司殊榮
Copyright Claims
Copyright Claims