播出日期:20/6/2018
最新嘅科技資料、潮流玩意，都有《Z世代達人》麥卓華到處搜羅送到你面前！
共享單車大家就聽得多喇，不過我就唔鐘意玩D成日都有得玩嘅嘢，如果可以共享一架私家車又唔錯喎！
今日要介紹嘅就係早排在新加坡推出嘅 BlueSG 共享汽車計劃。有別於一般嘅租車服務，BlueSG由登記到訂車甚至去到攞車都係全自動操作，用嘅全部都係快速叉電嘅電動車，既方便又環保，由於呢個計劃喺新加坡唔同嘅熱門地點都有車位同叉電站，所以呢都可以免除昂貴嘅泊車費用。
如果用呢個服務，首先要喺你部手機下載BlueSG嘅流動應用程式，如果係第一次使用，就要上載你嘅身份證明文件、有效嘅車牌同埋信用卡等等嘅資料比佢哋做批核。當登記同埋批核手續完成之後，你就可以拎埋你張Ezlink交通卡，去到其中一個BlueSG泊車位啟動服務。
入咗啟動碼，同意咗使用條款，之後畫面就會提示你去攞車。你首先要喺車頭位嘟多次你張Ezlink卡，車門就會解鎖，同一時候，你可以停咗個叉電，就可以開車。因為架車係全電動，揸起上來相當靜，操作上亦相對簡單。
如果你出門口前想知附近有無車租，亦可以透過佢哋嘅手機應用程式搵到相關資料同埋留車，你亦可以預約你目的地嘅車位，咁就萬無一失。收費方面大約係$2-$3港幣一分鐘，都算合理。香港唔知幾時先有機會用到呢個服務呢？
《Z世代達人》
主持：麥卓華
