播出日期:21/12/2018
八達通手機應用程式早前又有更新，今次加入咗乜野功能呢？ 今日就同大家睇下。
今次都算係一個比較大嘅更新，全新設計嘅介面，比之前更清楚顯示OEPay戶口、Sim卡八達通同埋Samsung Pay八達通卡嘅餘額，而相比之前要去到App入面嘅「轉入」、「轉出」功能幫八達通卡增值，宜家已經更新為「增值」選項、唔熟呢個App嘅朋友仔亦都唔駛周圍搵啦！
另外，官方表示今次更新加入咗查閱過去3個月嘅交易紀錄功能。你可能會話、唔係一向都有呢個功能咩？ 我哋不如回帶睇下，之前要查閱有關嘅交易紀錄，一定要用有NFC功能嘅手機拍卡先做到。更新咗之後，只要好似我咁，在App入面啟動免NFC查閱功能，再用卡確認，之後打開八達通App就可以即時查閱到交易紀錄。你可能會問、有乜用呢？其實如果你想睇下小朋友嘅交易紀錄同埋有無亂買野、呢個功能就唔駛次次問佢哋拎卡咁尷尬，亦都可以實時睇到相關嘅數據。另外，用唔到NFC嘅iPhone用家亦可以透過呢個功能去查閱到交易紀錄啦！
《Z世代達人》
麥卓華
