播出日期:14/12/2018
三星近年除咗積極推廣佢哋Galaxy S系以及Note系嘅旗艦級手機之外，亦大力開拓中階機市場，啱啱推出嘅 Galaxy A7 就係針對唔需要用到旗艦處理器又想影到靚相嘅用戶，咁呢部機有乜特別呢？今日就同大家開箱！
我手上面呢部係台灣行貨嘅Galaxy A7，打開包裝之後，除咗部機本身，入面亦都有一個基本嘅透明膠殼， SIM卡針，耳機，充電線，同埋充電插頭，配件都算跟得幾齊。
睇埋部機先，拎上手一啲都唔重，而且非常之薄，音量制同埋電源開關都係部機嘅右手邊，底部除咗喇叭之外就係一個3.5mm嘅耳機插同埋 MicroUSB 充電位。相信唔少朋友都因為部機唔係用USB-C充電有啲失望喇。不過呢部機最特別嘅地方，就係機背嘅三鏡頭設計，2400萬像素嘅主鏡頭外嘅其他兩個鏡頭分別負責景深同埋超廣角嘅功能，而前置自拍鏡頭亦都有2400萬像素，咁樣自拍都可以有高清相啦！
等我再拍埋部 iphone XSMax 旁邊比較下，大細其實差唔多，不過側邊睇就見到Galaxy A7 明顯薄好多，拎上手都冇咁聚手。
另外呢部機支援真3卡設計，兩張SIM卡同埋一張MicroSD卡糟都係獨立嘅，而唔係主流嘅三揀二嘅設計，部機支援雙4G功能，而記憶咭仲最高支援512GB，點影相都夠晒用啦！
既然部機主打影相，就等我試下先。當打開相機應用程式之後，見到拍攝畫面多咗廣告角同埋超廣角嘅選擇。當我在兩個模式之間切換嘅時候，好明顯見到，在超廣角模式可以見到埋摩天輪！呢個功能更加可以方便到成日要影群體相嘅朋友仔，以後就唔使係咁向後褪，都可以影晒所有人啦！
另外，如果開啟左自拍模式，你仲可以舉一舉隻手同部機示意ready，跟住相機就會自動開啟倒數模式，咁就唔使單手用拇指撳掣同埋配對自拍棍啦！
可能你會話，頭先介紹部機嘅外型嘅時候，機背唔見咗指紋辨識嘅位置。原來指紋辨識器已經同電源鍵合併左喇！呢個設計比起放後邊好，始終手指唔使申去機背，就手好多，不過個掣就細咗啲，做認證嘅時候就可能要郁多兩郁喇！
是手機又點可以唔睇埋安兔兔嘅跑分呢？可能唔係旗艦手機關係，跑分只有12萬幾，排行唔算太高，不過如果主要用嚟send下短訊同埋影下相其實都綽綽有餘喇！
《Z世代達人》
麥卓華
