Z世代達人

播出日期:7/12/2018

近年在內地嘅餐廳越來越流行用自己手機落Order叫嘢食,不過呢個風氣似乎有入侵香港嘅跡象,未試過?今日就同你去睇下啦!
 
話說早幾日我去咗青衣嘅元氣壽司高速線開餐,入到去坐低,突然發現平時用嚟落單嘅平板電腦唔見晒,正當想問點解嘅時候,服務員就拎左個有QR code嘅牌俾我,原來呢間分店要用自己嘅電話先可以落Order點餐!玩下先!
 
首先你要用自己嘅手機掃描呢個QR Code,之後就會用你手機嘅瀏覽器開啟指定嘅網頁,入到去就係訂餐嘅介面喇。相比起以前嘅平板系統,呢個手機介面更容易操作,反應亦都明顯快咗,落order都開心啲啦!揀好晒嘢食,確定埋,唔駛好耐,叫咗嘅壽司就送到我面前喇!仲有我可以隨時睇到自己叫過啲乜嘢同埋張單幾錢,我就覺得唔錯喇!
 
我都有問過呢度嘅服務員,如果客人冇手機或者上唔到網咁又可以點呢?原來佢哋都有後備嘅手機可以借比客人用,咁就唔怕因為冇手機搞到冇飯食啦!
 
暫時呢個訂餐系統都只係取代咗之前嘅平板落單,俾錢都仲要埋counter人手處理。不過在呢個乜都講電腦化同自動化嘅年代,好多餐廳甚至超市都己經用緊自助落Order甚至收錢嘅服務,唔知你又習唔習慣呢?
 
《Z世代達人》
麥卓華

追蹤我們
公司殊榮
Copyright Claims
Copyright Claims