播出日期:20/3/2019
之前都有同大家介紹過3D立體度身服務，你只要行入特製嘅3D身體掃瞄器就可以幫你完成度身嘅程序。不過你又有無諗過，宜家只要用一部手機加一套特定嘅衫，就可以在屋企完成呢個度身體驗呢？
講緊嘅就係由 zozo.com 推出嘅 zozosuit 喇。呢件衫有超過350個呢啲白色嘅感應點，配合佢哋嘅手機應用程式，你就可以在任何地方幫自己精確咁度身。
要用呢個服務，首先要上zozo.com訂呢件 zozosuit。呢件衫本身係免費嘅，你只要輸入你嘅身高、體重同埋性別，連同地址等基本資料同俾埋運費，呢件衫就會喺大約會在3-6日寄到俾你喇！
收到呢衫之後，你要下載zozosuit呢個手機應用程式，之後打開呢個應用程式，再用先前喺zozo.com 登記嘅戶口登入，就可以開始度身喇。
我哋先按Measure，之後佢會提示你輸入基本嘅資料好似體重同埋身高，跟住就要着咗件zozosuit。着呢件衫都有啲要求架喎，首先要留意件衫前後唔好掉轉，着嘅時候手指公同埋腳踭都要穿過件衫嘅窿窿，仲要拉行件衫，同埋有啲白點要跟足指示對準手腕同腳踭嘅骨頭位，之後將部手機按指示放好，就可以開始喇。
放好咗部手機之後，個app會聲控提示你嘅企位係唔係正確，同埋姿勢啱唔啱… 之後就影一共12張相…
好快你嘅身形同埋度身嘅數據就會呈現喺手機同埋直接上傳到zozo.com嘅伺服器上面，咁以後只要上zozo.com，就可以從你嘅數據訂製最啱你身形嘅衫褲，咁就唔怕喺網上買完唔啱身啦！
Z世代達人
麥卓華
