Z世代達人

播出日期:29/3/2019


三星2019年度發佈嘅旗艦手機Galaxy S10+ 以Mon靚影相靚為賣點,今日就等我同大家做個簡單嘅開箱!

今次三星都算有心思,包裝盒入面除咗有主機同埋一般嘅配件好似快速充電器、USB-C充電線、Sim卡針同埋耳機次外,亦包括咗由S9開始已經有包嘅基本透明手機殻,同埋預先貼好咗嘅Mon貼喇。官方話為咗確保超聲波屏下指紋解鎖可以有效操作,建議用戶要用認可嘅Mon貼,亦都隨手機預先貼好一張,拎到機嘅朋友就可以即刻用啦!

睇下部機先,大細同手上嘅Iphone Xs Max差唔多,拎上手手感就比較輕。因為飛走咗上下兩條粗邊,改用Infinity-O 嘅設計,屏佔比相比S9進一步提昇,不過如果用部機睇片,因為片源大部份都係16:9嘅原故,左右兩邊都係會有條黑邊。雙卡雙待位都係行3選2設計,即係如果要行兩張Sim卡,就放唔到記憶卡喇、不過以128GB起跳嘅容量,相信都夠一般人用啦!

用咗高通S855處理器嘅S10+,操作嘅時候相當暢順,上網、睇片都無疾嘅情況出現,做埋個測速試試先,在正常嘅人流環境之下都有超過200mbps嘅下載網速,絕對收貨。

好喇相信大家最關心嘅應該都係影相嘅表現喇。正如我哋之前節目嘅介紹,今次S10+後置三鏡頭嘅最大特色就係景深同埋超廣角,試下「超廣角」嘅功能先。打開相機,睇到畫面左面嘅3個控制鍵,最頂嘅係超廣角,中間嘅就係正常鏡頭,在超廣角模式同正常模式下切換,大家就見到分別相當大,最適合影合照又唔夠地方嘅時候使用喇!

景深切換亦都係S10系列嘅賣點。等我試試俾大家睇下啦!我以呢個茶壺做主體,開啟景深切換嘅模式,當我在適當距離對準茶壺後,只要調較模糊嘅幅度,背景就會起變化,要影大師級嘅人像或者物件相就話都無咁易啦!

之後我哋就試埋個夜景喇。今次我拎埋部iphone Xs Max做比較、以開啟相機App再自動偵測模式嘅相為準。兩部手機都影到比肉眼更光嘅影像,不過就以S10+較光,如果經常要夜攝嘅朋友就岩晒喇。

S10+ 有兩個前置鏡頭,所以當我做Selfie嘅時候,一樣可以使用超廣角模式,同埋玩埋即時景深都得㗎!

相機嘅介面同軟件亦睇得出落咗唔少功夫,加入咗人工智能嘅元素,在對準要影嘅景物時,會即時分析係乜嘢類別而調整影像嘅效果,好似係室內景物、室外景物、食物、以至飲品、同埋影人物都可以在短時間內分辨出來㗎!

屏下指紋辨識解鎖方面,效果比我想像中更好,過程流暢!

等我試埋S10+嘅雙向無線充電功能先。使用方法非常簡單,只要在下拉功能表揀「Wireless Power Share」再揀開啟,之後將要充電嘅裝置例如戴能手錶又或者好似我咁將部Iphone 放在機背,就可以當呢S10+係充電板咁使用!有時去Trip唔夠頭或者唔想帶咁多線,呢個功能就大派用場喇!

Z世代達人
麥卓華

追蹤我們
公司殊榮
Copyright Claims
Copyright Claims