播出日期:27/3/2019
華為於2019年3月26日在美國三藩市發佈咗P30 系列嘅旗艦手機，等我用幾分鐘嘅時間同大家一齊睇下呀！
今次發佈嘅有P30同埋P30 Pro 兩款手機，對比上一代P20系列，P30系列都轉用咗水滴屏取代瀏海屏，進一步提昇屏佔比，而P30 同 P30 Pro分別採用咗 6.1寸以及 6.47寸嘅屏幕，亦加入咗屏下指紋認證技術。配置上，P30系列採用咗華為自家嘅 Kirin 980晶片、P30採用咗 6GB Ram以及 128GB內存，而配備8GB Ram嘅 P30 Pro就可有高達512GB嘅內置容量，亦支援 Nano Memory Card作為外置記憶用。P30 Pro 就支援高達 40W 嘅有線充電，即係由完全無電充到大約7成電，都只需要30分鐘嘅時間。無線充電方面，亦支援15W嘅高速快充。另外，P30 Pro亦同主流旗艦機睇齊，支援雙向充電。
大家最關心嘅，相信都係P30系列嘅鏡頭同埋影相功能喇。外觀上大家都以為P30 Pro 同 P30 系列一樣，有3個後置鏡頭，但睇真啲，原來P30 Pro比 P30 有多一個較細嘅 ToF 景深測量鏡放咗在旁邊，連到4000萬像素主鏡頭、以及支援5倍光學變焦以及10倍無損變焦嘅800萬像素遠攝鏡同埋一個超廣角鏡一共4個鏡頭，另外，P30 Pro嘅主鏡頭光圈值亦比P30高，拍攝效果就當然更好。感光嘅模組方面，今次華為亦改用咗Super Spectrum元件，數據上比以往吸收嘅光源提升40%，官方表示，在肉眼都看不清楚嘅地方，都可以拍出滿意嘅相片。 P30 Pro 亦都在Dxo Mark評分中，得到整體112分嘅成縝，比 Samsung Galaxy S10+嘅109分仲要高。另外，兩部手機嘅前鏡亦用咗3200萬像素嘅鏡頭，同時支援低光拍攝技術，Selfie都一樣可以影到靚相啦！
拍攝軟件方面，P30系列除咗支援HDR+，令相片更靚更自然之外，拍片模式亦花咗唔少心思。佢哋善用咗後置多鏡頭嘅優勢，可以支援雙鏡頭內步錄影功能，即係以廣角及Zoom嘅鏡頭同時拍攝，再分別顯示於畫面嘅左右兩邊，非常適合一般用家得一部手機，又想近遠都影到嘅時侯用喇。
P30系列將推出5種機色顏色，包括極光藍 、淺藍、亮黑、橙紅以及未必會在香港推出嘅貝殼白色，預計香港將會於4月初接受預訂。價錢方面，P30賣 Euro799，P30 Pro 嘅 128GB、256GB以及512GB版本就分別賣 999、1099以及1249歐元。香港嘅賣價暫時未定，不過正常會比歐洲地區平大約20%左右。
Z世代達人
麥卓華
