播出日期:9/11/2018
今日我部全新 iPad Pro 11" 就到手喇，當然要第一時間同大家做個開箱啦！今日我亦都拎埋用緊嘅2017年版 iPad Pro 10.5"做個對比，睇下新機相對於舊機有乜野改良嘅地方。
全新嘅 ipad pro 11"版嘅包裝唔算好特別，同以往嘅 ipad 都差唔多。我手上嘅係ipad pro 11" 64GB wifi + Cellular型號。打開包裝盒之後，除咗部ipad本身之外，入面仲有一條 USB-C 去 USB-C 嘅充電線，一個支援 USB-C 頭嘅充電插頭，同埋一個入面有簡介說明書同埋SIM卡針嘅Folder仔。
睇下部機本身先，正如之前發佈會見到一樣，四邊都係起角，睇落去好似一塊切生果嘅砧板咁，我自己就好鍾意喇。最特別嘅就係唔再用 Lightning充電頭，而改用USB-C頭，但就無咗3.5mm嘅耳機頭，其實真係有啲唔太方便。SIM卡插位就在部機嘅右下方，之前嘅 iPad 因為用圓邊設計，換SIM有時有啲難度，支針唔係咁易開到個Slot，反而宜家就非常簡單喇。
等我拍埋部上一代嘅 ipad pro 10.5 比較下先，拎上手，兩部機嘅重量差唔多，拍埋度下，可以見到大細亦無大分別，新機相對上一代只是窄咗小小，不過因為邊框幼咗同埋無咗Home掣，Mon比上一代更大，如果打橫部機睇片，亦無咗左右唔平衡嘅感覺。可惜嘅係因為比例問題，同舊機一樣睇16:9片都係會有上下兩條黑邊。
講咗咁耐，特我爆咗部機先。流程同爆 iPhone 基本上係一樣，但大家唔知有無留意，宜家爆機越來越多嘢問，呢部ipad pro我都搞咗成兩分鐘先爆完部機，仲有好多嘢其實係未set好嘅。試下set個 FaceID先，同 iPhone 一樣，轉下個頭同部機就reg完，解鎖亦都好快。不過對住部咁大嘅機做FaceID解鎖又真係有啲攪笑。
講下部機嘅USB-C頭，除咗可以幫iPad本身充電之外，其實亦可以幫其他裝置充電。好似我咁，用跟機嘅USB-C線一邊插住部iPad，一邊插住我部 Galaxy S9，基本上唔駛任何設定就充到！而用USB-C頭嘅另一個好處就係可以有更多嘅配件選擇，以前如果要將部 iPad 駁上電視，就要用Apple專用嘅HDMI去Lightning轉插，咁一般嘅USB-C HDMI轉插又用唔用到落呢部機？ 試下先… 得咗！
最後睇埋跑分先，我哋用網上版嘅Basemark做一個測試，同上一代嘅 iPad Pro 比較下。測試開始咗一陣，已經見到新機較舊機快完成每個測試… 新機有七百幾分，相對上一代嘅四百幾分，整體表現真係有好大嘅提升！
《Z世代達人》
麥卓華
