播出日期:27/7/2018
最新嘅科技資料、潮流玩意，都有《Z世代達人》麥卓華到處搜羅送到你面前！
生活入面，無論係手機應用程式、定係電腦網頁，無講係登入銀行戶口、定係要登入你嘅社交網絡平台，你都會有一組用戶名稱同埋密碼。隨著我哋要使用嘅服務越來越多，我哋要記住嘅密碼組合都越來越多。你又係乜嘢方法呢？搵紙筆寫低？定自己電郵個List俾自己？ 今日等我介紹個科學啲嘅方法俾大家啦！
講緊嘅就係 「Last Pass」呢個手機應用程式服務喇。如果你重來無用過「Last Pass」嘅服務，首先要完成簡單嘅登記，包括輸入你嘅登記電郵，同埋你以後要記住嘅密碼，如果你用緊 IPHONE X，仲可以好似我咁，登記埋用FaceID，咁就唔駛次次入頭先登記嘅密碼喇！跟住按程式嘅要求，開埋相關嘅設定同權限就摘掂晒！
咁要點樣輸入你嘅密碼組合呢？如果你要入嘅密碼係一D常用嘅網頁登入，你可以去Last Pass入面，揀咗「Site」之後，揀右入角嘅「加入」，之後揀翻岩嘅網頁，之後入翻相關嘅用戶名稱同埋密碼再確認就搞掂！如果你嘅網頁或者服務唔在下面嘅選擇入面，你一樣可以揀上面嘅「Save Custom Site」，之後入番網址同埋密碼組合就可以喇！
到咗我要搵翻呢個密碼嘅時侯，只要打開Last Pass，之後揀翻要睇嘅服務密碼組合，再揀「Show Password」，個密碼就會顯示出來喇！ 如果你在手機打開呢個網頁，其實你可以選擇更多、再揀Last Pass、之後揀翻相關嘅密碼組合，咁就連打多次密碼都唔需要啦！另外，你亦都可以在你電腦嘅 Chrome 瀏覽器上面安裝 Last Pass 組件再登入，咁你在電腦瀏覽器登入相關嘅網頁，都一樣可以用到儲存咗嘅密碼組合登入啦！
你可能會話，用Last Pass比就咁開個File Save低或者Email俾自己安全幾多呢？ 其實Last Pass每次都唔會直接儲存你打入去嘅密碼，而係會以加密嘅方式去儲存，每次你要睇或者用個Password，都會以為輸入嘅密碼同埋相關嘅解密匙去解密翻出來，所以就算有人拎到Server或者手機入面嘅資料，佢哋都唔會睇到你嘅密碼，除非你連個主密碼都俾人知埋啦！
《Z世代達人》
麥卓華
