播出日期:8/8/2018
Nokia呢個品牌在2017年重返智能電話市場後，一直都有推出針對唔同市場嘅智能電話。而Android系統亦為咗想進一步打入無咁先進嘅地區，Android打造咗俾低價智能電話用嘅Android輕便版Android Go，Nokia亦於今年中推出咗Nokia 1呢部Android Go電話。雖然香港無得賣呢部電話，不過我就空運咗一部返來，同大家一齊開箱！
我手上呢部Nokia1嘅售價為番港幣大約600蚊左右，配備只有1GB Ram同埋8GB嘅儲存空間，4.5吋螢幕，以及雙卡雙待功能。不過當一張卡行緊4G嘅時候，另一張卡就只支援2G網絡喇。呢部機以MicroUSB充電，亦有3.5mm嘅耳機插位，值得一提嘅，係一樣支援VoLTE，即係以行緊4G嘅SIM卡作通話時，唔駛跌落3G網絡。
頭先都提過，佢行緊嘅係輕便版本嘅Android系統 Android Go，其實用戶介面上，唔會有好多唔同嘅地方，反而因為Android Go唔會有廠商預載嘅軟件，所以一開機，就係一個好乾淨嘅清水版Android。 我哋首先入去 Play Store睇下。一入到去，同用慣嘅Android手機最唔同嘅，就係多咗Android Go精選。其實入面嘅App，有部份係同一般Android版無分別，有部份好似Facebook Lite咁，就係專門針對入門Go版本推出嘅。咁我哋就下載Facebook Lite試下啦… 下載好，登入睇下？其實都無好大分別，反而反應感覺上仲比裝在中階機嘅一般Facebook App爽！
今時今日唔理係唔係入門，大家對於部機睇唔睇到片都好關心。我地試下用Youtube睇，再搵部中階嘅紅米6同埋旗艋機IphoneX睇下。播片嘅效果唔算有大問題，不過受限於得4.5吋Mon，睇落就無咁舒服。我哋再將難度升級，加行新聞走馬燈再睇下！ 呢個比較就睇到，iphoneX仲係好順，但紅米6就久不久會Chok下Chok下，Nokia 1 就真係好似機械人咁定格重溫。呢方面睇來在平價機上面都係暫時無得解決喇。
再睇下測速，由於Nokia1 只係內置咗基本嘅數據晶片，雖然都係行4G，不過速度就會比較慢，但係其實呢部電話都係用下Whatsapp或者睇下新聞上下網，呢個速度絕對夠用有餘。而且呢部機都支援Wifi熱點分享功能，所以當佢係後備嘅Wifi蛋都可以架！另外，我手上面呢部Nokia1仲有FM收音機嘅功能，只要插番耳機做天線，就可以透過大氣電波收聽電台節目！
最後試埋個影相功能喇！ 500萬象素嘅後置鏡頭影出來嘅相都算收貨，反而相機對焦同反應都夠快，就真係有D驚喜！
Nokia1 配備太基本，對於一般都市人來講，未必夠用。但係以呢部機嘅價錢同埋功能來講，在新興地區就扮演咗一個重要嘅角色喇。
