播出日期:1/8/2018
最新嘅科技資料、潮流玩意，都有《Z世代達人》麥卓華到處搜羅送到你面前！
如果你有用開Chrome瀏覽器，近來唔知你有無發現，去一D平時去開嘅網站，都會在網址列顯示「不安全」呢？ 另外一D網站，又會見到「安全」，又或者見到有一把綠色嘅鎖頭。咁被標示咗「不安全」嘅網站，其實又係唔係真係唔安全呢？
在呢個黑客猖狂嘅年代，為咗提醒用戶要注意網站連線是否已加密，Chrome於七月尾就逐步發放左相關更新，如果網站冇使用SSL加密嘅連線，亦即係只使用http連線，網址列旁邊就會出現「不安全」嘅警告，提示用戶佢哋瀏覽網頁同埋輸入嘅資料在傳送過程中都無加密，黑客只要截取到連線，就會知道相關嘅內容喇。
其實依家仲有好多網站未有使用SSL加密、即係以https://作網址開頭，咁係唔係又代表去呢啲網站就會唔安全呢？其實又唔可以咁講嘅，如果你只係喺呢啲網站睇吓片、睇下新聞，連線有無加密，其實都唔大影響，但如果相關嘅網頁要求你輸入個人資料，咁你就要留意可能會有第三者輕易就睇到你啲資料喇！
調返轉講，顯示「安全」嘅網站，又係唔係百分百安全呢？其實呢個「安全」嘅標示只係代表左你同睇緊嘅網站之間嘅連線經過加密，但絕對唔代表網站收集你個人資料或者密碼嘅用途。如果你係處理緊同錢銀有關嘅資料，建議你可以睇吓安全嘅表示會唔會有埋相關嘅公司名，因為呢啲認證嘅審查會比一般只顯示安全嘅認證較為嚴格，在網址列列出嘅資料亦都會較多，你仲可以按入去睇到證書嘅更多資料，核對相關嘅銀行或者金融機構嘅名稱。總之都係一句小心駛得萬年船，如果遇到唔識嘅網站千祈唔好亂入資料呀！
《Z世代達人》
麥卓華
