播出日期:5/12/2018
呢排上Facebook，唔多唔少在Timeline見到有朋友玩下測字算命，睇下乜嘢顏色岩自己咁。有時都會心動自己玩埋一份，你可能會覺得都係一個遊戲，唔駛咁上心。就係因為大家唔上心，呢類遊戲就可以「為所欲為」，隨時會惹來麻煩呢？
呢類小遊戲，其實在技術上，係Facebook入面第三方提供嘅「小程式」。原意係希望俾唔同嘅專頁可以自己透過程式，加入Facebook本身無嘅功能，增加社交媒體嘅趣味性同互動性。不過，因為呢類程式唔多唔少都會用到你嘅朋友名單同埋個人資料，所以你參與前都會問你係唔係授權，不過好多朋友都會輕視咗呢個授權，之後就後患無窮！ 針對今次OMG呢個小程式，大部份玩過嘅朋友都話收到好多廣告通知，同時佢哋嘅朋友亦會因為「被邀請」出現連鎖式中招，網上更加有人懷疑因為呢個程式嘅關係，在無通知嘅情況下購買咗付費嘅程式。
如果你玩過OMG，我就建議你盡快同佢「劃清界線」。要點做？好簡單，你只要去「設定」、「即時遊戲」、「使用中」揀番 OMG、拉到最底後按「移除即時遊戲」、記得揀埋刪除遊戲紀錄、防止你嘅朋友睇到之後再次中招，最後按「移除」就攪掂！其實用呢個方法，你仲可以搵到你授權咗乜嘢程式去用你嘅資料，如果已經好耐無玩，我都建議你移除咗先！
《Z世代達人》
麥卓華
